• Log Toot Jaate Hain Ek Ghar Banaane Mein,
    Tum Taras Nahi Khate, Bastiyaan Jalaane Mein;

    Aur Jaam Tootenge Is Sharaab-Khaane Mein,
    Mausmon Ke Aane Mein, Mausmon Ke Jane Mein;

    Har Dhadakkate Patthar Ko Log Dil Samajhte Hain,
    Umr Beet Jaati Hai, Dil Ko Dil Banane Mein;

    Fakhtaa Ki Mazboori Yeh Bhi Keh Nahi Sakti,
    Kaun Saanp Rakhta Hai Uske Aashiyane Mein;

    Doosri Koi Ladki Zindgi Mein Aayegi,
    Kitni Der Lagti Hai Usko Bhool Jaane Mein!
    ~ Bashir Badr
  • Ye Sard Raatein Bhi Ban Kar Abhi Dhuaan Uad Jaayein,
    Woh Ik Lihaaf Main Odhu To Sardiyaan Uad Jaayein;

    Khudaa Ka Shukr Ki Mera Makaan Salamat Hai,
    Hain Utani Tez Hawaayein Ki Bastiyan Udd Jaayein;

    Zameen Se Ek Talluk Ne Baandh Rakha Hai,
    Badan Mein Khoon Nahi Ho To Haddiyaan Udd Jaayein;

    Bikhar-Bikhar Si Gayi Hai Kitaab Saanson Ki,
    Yeh Kaagzaat Khudaa Jaane Kab Kahan Udd Jaayein;

    Rahe Khyaal Ki Mazoob-e-Ishq Hain Hum Log,
    Agar Zameen Se Phoonke To Aasmaan Udd Jaayein;

    Hawaayein Baaz Kahan Aati Hain Sharaarat Se,
    Saron Pe Haath Na Rakhein To Pagdiyaan Udd Jaayein;

    Bahut Guroor Hai Dariyaa Ko Apne Hone Par,
    Jo Meri Pyaas Se Uljhe To Dhajjiyan Udd Jaayein!
    ~ Rahat Indori
  • Barabar Se Bach Kar Guzar Jaane Vaale,
    Ye Naale Nahi Be-Asar Jaane Vaale;

    Nahin Jaante Kuchh Ki Jaana Kahan Hai,
    Chale Jaa Rahe Hain Magar Jaane Vaale;

    Mire Dil Ki Betabiyan Bhi Liye Ja,
    Dabe Paanv Munh Pher Kar Jaane Vaale;

    Tire Ik Ishare Pe Sakit Khade Hain,
    Nahin Kah Ke Sab Se Guzar Jaane Vaale;

    Mohabbat Mein Hum To Jiye Hain Jiyenge,
    Woh Honge Koi Aur Mar Jaane Vaale!
    ~ Jigar Moradabadi
  • Aankhon Se Mere Isliye Laali Nahi Jaati,
    Yaadon Se Koi Raat Khaali Nahi Jaati;

    Ab Na Umr Na Mausam Na Raste Ke Woh Patte,
    Is Dil Ki Magar Khaam-Khayali Nahi Jaati;

    Maange Tu Agar Jaan Bhi To Hans Kar Tujhe De Du,
    Teri Toh Koi Baat Bhi Taali Nahi Jaati;

    Maloom Humein Bhi Hain Bahut Se Tere Qisse,
    Par Baat Teri Humse Uchhali Nahi Jaati;

    Hum-Raah Tere Phool Khilaati Thi Jo Dil Mein,
    Ab Shaam Wohi Dard Se Khaali Nahi Jaati;

    Hum Jaan Se Jayenge Tabhi Baat Banegi,
    Tumse To Koi Baat Nikaali Nahi Jaati!
  • Mera Zameer Mera Aitbaar Bolta Hai,
    Meri Zubaan Se Parvardigaar Bolta Hai;

    Teri Zubaan Katarna Bahut Zaroori Hai,
    Tujhe Maraz Hai Ki Tu Baar-Baar Bolta Hai;

    Kuch Aur Kaam Use Yaad Hi Nahi Shayad,
    Magar Woh Jhooth Bahut Shaandaar Bolta Hai;

    Khuda Ne Uske Labon Par Mithaas Rakh Di Hai,
    Woh Bolta Hai Toh Jaise Sitaar Bolta Hai!
    ~ Rahat Indori
  • Tum Chale Jaaoge Toh, Kaise Mulaqaat Hogi,
    Na Hi Katega Din, Na Guzar Meri Raat Hogi;

    Meri Zindagi Ki Khushiyaan, Tumse Hai Wabasta,
    Tumhare Bina Ab Toh, Sooni Meri Qainaat Hogi;

    Beete Lamhon Ko Yaad Kar, Tumhein Mehsoos Karenge,
    Labon Se Muskurayenge, Aur Aankhon Se Barsaat Hogi;

    Kitna Dil-Nasheen Hoga, Tumhari Yaadon Ka Manzar,
    Ki Tumhari Tasveer Seene Se Lagakar, Meri Baat Hogi;

    Chahe Kahin Bhi Raho Tum, Bas Humein Hi Paaoge,
    Tumhare Hum-Raah Ab Toh, Meri Yaad Saath Hogi;

    Tum Hi Meri Khwahish Ho, Sada Muskurate Rehna,
    Sang Tumhare Meri Jaan, Meri Duaon Ki Saugaat Hogi!
  • Tum Aaye Ho, Na Shab-e-Intezar Guzri Hai,
    Talash Mein Hai Sahar, Baar, Baar Guzri Hai;

    Junoon Mein Jitni Bhi Guzri Bekar Guzri Hai,
    Agarche Dil Pe Kharabi Hazaar Guzri Hai;

    Woh Baat Sare Fasane Mein Jiska Zikr Na Tha,
    Woh Baat Un Ko Bahut Nagavar Guzri Hai;

    Na Gul Khile Hain, Na Un Se Mile Hain, Na Mai Pi Hai,
    Ajeeb Rang Mein Ab Ke Bahaar, Guzri Hai;

    Chaman Pe Gharat-e-Gulchin Se Jane Kya Guzri,
    Qafas Se Aaj Saba Be-Qarar Guzri Hai!
    ~ Faiz Ahmad Faiz
  • Ulti Ho Gayi Sab Tadbeerein Kuchh Na Dawa Ne Kaam Kiya,
    Dekha ! Is Beemaari-E-Dil Ne Aakhir Kaam Tammam Kiya;

    Ahad-E-Jawaani Ro Ro Kaata, Peeri Mein Li Aankhein Moond,
    Yaani Raat Bahut The Jaage, Subah Huyi Aaraam Kiya;

    Naahak Ham Majbooron Par Yeh Tohmat Hai Mukhtaari Ki,
    Chaahte Hain So Aap Kare Hain Hamko Abas Badnaam Kiya;

    Yaan Ke Sapaid-O-Siyaah Mein Hamko Dakhl Jo Hai So Itna Hai,
    Raat Ko Ro Ro Subah Kiya Ya Din Ko Jun Tun Shaam Kiya;

    'Meer' Ke Deen-O-Mazhab Ko Ab Poocho Kya Ho Un Ne To,
    Kashqaan Khaincha, Deher Mein Baitha, Kab Ka Tarq-Islaam Kiya!
    ~ Meer Taqi Meer
  • Yeh Narm Narm Hawa Jhilmila Rahe Hain Chirag,
    Tere Khyal Kee Khushboo Se Bas Rahe Hain Dimag;

    Dilon Ko Tere Tabassum Kee Yaad Yun Aayi,
    Ki Jagmaga Uthe Jis Tarah Mandiron Mein Chirag;

    Tamaam Shola-E-Gul Hai Tamaam Mauj-E-Bahaar,
    Ki Taa-Had-E-Nigaah-E-Shauq Lahlahate Hain Baag;

    Nayi Zameen, Naya Aasmaan, Nayi Duniya,
    Suna To Hai Ki Mohabbat Ko In Dinon Hai Farag;

    Dilon Mein Daag-E-Mohabbat Ka Ab Yeh Aalam Hai,
    Ki Jaise Neend Mein Doobe Hon Pichali Raat Chirag;

    Firaq Bazm-E-Chiragan Hai Mehfil-E-Rindan,
    Saje Hain Pighli Hui Aag Se Chalkate Ayaag!
    ~ Firaq Gorakhpuri
  • Itna To Dosti Ka Silaah Dijiye Mujhe,
    Apna Samajh Ke Zeher Pila Dijiye Mujhe;

    Uthe Na Taa-Ke Aap Ki Janib Nazar Koi,
    Jitni Bhi Tohmtain Hain Lagaa Dijiye Mujhe;

    Kyon Aap Ki Khushi Ko Mera Gham Kare Udaas,
    Ik Talkhh Haadsa Hun Bhula Dijiye Mujhe;

    Main Aap Ke Kareeb Hi Hota Hun Har Ghadi,
    Mauka Kabhi Pade To Sada Dijiye Mujhe;

    Har Cheez Dastiyaab Hai Bazaar Mein Adam,
    Jhoothi Khushi Khareed Ke La Dijiye Mujhe!
ADVERTISEMENT
ADVERTISEMENT